Lam 4 | NdeIBE | STEP | Yeka igolide eselilahlekelwe yikukhazimula kwalo, igolide elicengekileyo selijujukile! Amatshe aligugu angcwele aselahliwe ekuqaliseni kwemigwaqo yonke.

Lamentations 4

1 Yeka igolide eselilahlekelwe yikukhazimula kwalo, igolide elicengekileyo selijujukile! Amatshe aligugu angcwele aselahliwe ekuqaliseni kwemigwaqo yonke.

2 Yeka izinsizwa zaseZiyoni ezincomekayo, ezake zaba lesisindo njengegolide, okwamanje sezingathi yizimbiza zebumba, umsebenzi wezandla zombumbi!

3 Ngitsho lamakhanka asemunyisa abantwabawo emabeleni awo, kodwa abantu bami kabaselazwelo njengezintshe enkangala.

4 Ngenxa yokoma ulimi losane lunamathele olwangeni lomlomo; abantwana bancenga becela isinkwa kodwa kakho obaphayo.

5 Labo ababesidla izicwicwicwi sebe yiziceli emigwaqweni. Labo abondliwa ebutifitifini sebelala esilotheni sezibi.

6 Isijeziso sabantu bakithi sikhulu kuleseSodoma, yona eyabhujiswa ngomzuzwana akwaba lasandla esazama ukunceda.

7 Amakhosana abo ayekhazimula kulongqwaqwane, emhlophe nke kulochago, imizimba yabo ebomvana njengamatshe ohlobo lwerubhi, ukubukeka kwabo kunjengelitshe elikhazimulayo.

8 Kodwa manje sebemnyama kulomsizi; kabasananzwa langubani emigwaqweni. Isikhumba sabo sesinamathele emathanjeni abo; sesome okogodo.

9 Bangcono labo ababulawa ngenkemba kulalabo abafa ngendlala; bacaka baphele bekhukhuzwa yindlala ngoba kungelakudla okuvela emasimini.

10 Ngezabo izandla abesifazana abalesihelo babaphekile abantwababo, babenza ukudla kwabo ngesikhathi abantu bakithi bebulawa.

11 UJehova ubhodlisile intukuthelo yakhe; uluthulule ulaka lwakhe olwesabekayo. Uwulumathisile umlilo eZiyoni watshisa izisekelo zayo.

12 Amakhosi omhlaba ayengakholwa, labantu basemhlabeni, ukuthi izitha labahlaseli bangangena emasangweni aseJerusalema.

13 Kodwa kwenzakala ngenxa yezono zabaphrofethi bakhona lamanyala abaphristi bakhona, abachitha ngaphakathi kwalo iJerusalema igazi labalungileyo.

14 Manje sebephumputha emigwaqweni njengabantu abayiziphofu. Sebengcolisiwe ngegazi kangangoba kakuselamuntu ongathinta izivunulo zabo.

15 Abantu bayabaxotsha bathi, “Sukani! Lingcolile! Sukani! Sukani! Lingasithinti!” Nxa bebaleka bentula, abantu bezizwe bathi, “Ngeke bahlale lapha njalo.”

16 UJehova ngokwakhe ubahlakazile; kasabalondolozi. Abaphristi kabasahlonitshwa, lezikhulu kazisananzwa.

17 Phezu kwalokho, amehlo ethu asethundubele elindele ize engaboni sizo; siseziqongweni zethu zokulinda salindela isizwe esasingelancedo kithi.

18 Abantu babesicwathela ngaphi langaphi, ngakho sasesisesaba ukuhamba emigwaqweni yethu. Sasesiphelelwe, izinsuku zethu sezibaliwe, ngoba isiphetho sethu sesifikile.

19 Abasixotshayo babelejubane kulezingqungqulu emkhathini; baxotshana lathi ezintabeni njalo basicathamela enkangala.

20 Ogcotshiweyo kaJehova, oyikuphila kwethu uqobo, wabanjwa emijibileni yabo. Sakhumbula ukuthi ngaphansi kwesithunzi sakhe sizahlala phakathi kwezizwe.

21 Jabula uthokoze, wena Ndodakazi yase-Edomi, wena ohlala elizweni lase-Uzi. Kodwa lakuwe izafika inkezo le; uzanatha udakwe unqunulwe.

22 Ndodakazi yaseZiyoni, isijeziso sakho sizaphela; akayikwelula isikhathi sokuthunjwa kwakho. Kodwa, hiya Ndodakazi yase-Edomi, uzajezisa isono sakho achaye obala ububi bakho.